劇名：2035 編劇：方一玫
日期 2005-11-06 21:40:06 | 文章主題: 青年特飲
| 第一場
時間：夜
地點：飛馬酒吧（分樂隊表演區和吧檯區）
劇名：2035
編劇：方一玫
第一場
時間：夜
地點：飛馬酒吧（分樂隊表演區和吧檯區）
人物：德嵐、Band友甲、Band友乙、德嵐母、德嵐父、阿本、小金、酒客甲、酒客乙
小金（V.O.）：歡迎大家嚟到飛馬，踏入2035年，飛馬會繼續為大家帶嚟唔同既Band。我哋依家有請嵐樂隊為我哋演出。
【歡呼聲
【幕起
【音樂起
【強勁燈光亮
【德嵐與樂隊隊員在演奏區合奏，歌曲由激情豪邁轉至中慢版散場曲
【演奏完畢，場內一片歡呼聲
【德嵐等高興地謝幕
【燈光轉
【德嵐等在收拾樂器，隊友甲乙在互相推搪，有事要跟德嵐說
德嵐：（仍沉醉在剛才出色的表演中，高興地對甲乙說）好耐冇試過咁好反應喇！總算冇白費我哋練得咁辛苦。等陣宵夜，我既！
【乙推甲向德嵐
乙：德嵐呀！阿Kong有嘢同你講呀！
德嵐：有咩嘢聽日練嘢時再講啦！
甲：我哋聽日唔會嚟練夾Band喇！
德嵐：做咩呀？你哋又有事呀？咁唔掂架喎！夾Band既嘢，冇得偷懶架喎！
甲：我哋唔係偷懶，我哋係唔再同你夾啫！
德嵐：你講咩呀？
乙：我哋兩個決定另組一隊Band。
德嵐：咁即係算點呀？飛起我呀？當初唔係我，你哋會有今日？
甲：唔好講到好似你捧我哋咁，大家互相利用啫！
乙：我同阿Kong都覺得，冇辦法再同你合作落去。大家出嚟搵食啫，唔駛下下撐到咁行嘛！飯都冇得開，講咩嘢理想呀！
甲：仲有呀！你改下你啲脾氣啦！成日得罪人多，稱呼人少，因住俾人打呀！
德嵐：你哋講咩呀？退團咪退團囉，唔好乘機批評我。冇左你哋，我唔會死既，最多咪搵過第二啲人夾。
甲：你個朵出名臭架喇！想搵人同你夾，睇下點！
【隊友甲乙離去
【德嵐沮喪地站在台中央
【燈光轉
【憂傷音樂起
【德嵐父和母分別從右舞台和左舞台進場
【德嵐父和母的燈光亮
【音樂轉至背景音樂
母：（硬朗）我夠鐘走啦！
父：阿瑩，你可唔可以唔好走呀？
母：對唔住！我冇得揀！
父：你捨得德嵐咩？佢得十三歲咋！
母：我知道你會好好照顧佢。
父：你今日咁走左，將來一定會後悔既！
【父母燈光暗，燈光轉
【父母離場
【吧檯部份燈亮，小金在抹杯。搞事人甲乙在吧檯前方的小桌喝酒聊天。
【小金抹完杯，走向表演區部份
【音樂停
小金：咦？點解得你一個既？佢哋呢？
德嵐：佢哋有事走先！
小金：（看出德嵐不對勁，關心地）冇嘢呀嘛？
德嵐：（強裝）冇嘢！好口喝呀，俾啲嘢嚟飲吓呀！
小金：要飲嘢都要出番吧檯架！
【小金和德嵐走向吧檯區部份，德嵐途中撞到搞事人甲而不察覺
【小金在吧檯後取出Diamond Black，遞給德嵐
小金：冇嘢你唔會咁架喎。快啲講出嚟啦！
德嵐：我隊Band唔要我啦！
小金：（顎然）吓？唔係呀嘛？發生咩事呀？
德嵐：佢哋話我衝動，話我脾氣臭，佢哋以前唔係咁架！
小金：你唔好咁啦！可能係佢哋變左呢！呢啲人夾唔黎，咪同第二人啲夾囉！
德嵐：我唔知呀！我真係好俾心機去搞好呢隊Band架，而家到頭嚟，咩都冇哂！
小金：點會呢，你仲有我同阿本丫嘛！都係唔好啦，你今晚去我度訓啦，費事你一個人亂諗嘢！
德嵐：唔駛，我自己得架啦！
小金：拿！老友呢，就唔係俾你拒絕既！今晚去我度，安安靜靜咁訓一晚，聽朝就冇事架啦！信我啦！
德嵐：不過，你好夜先收舖喎！
小金：呀！係喎！（思索）嗯，咁，不如叫阿本去你度陪你呀。
【阿本進場，行到德嵐旁
小金：哈哈，就講就到！果然心有靈犀！佢黎左呀！
阿本：又講我咩嘢呀？
小金：你份人咁悶，邊有嘢俾人講呀！
阿本：（向德嵐）咦，你做乜好似唔開心咁既？
小金：（向阿本細聲說）佢隊Band散左呀！
阿本：唔緊要啦，Band之嘛，散左咪再夾過第二隊囉！夾Band呢樣嘢，不嬲都係換唔同既人嚟玩架啦！唔好諗咁多，我幫你攞啲嘢上車先！
【阿本拿著結他離場
【德嵐仍悶悶不樂，喝著悶酒。喝完，轉身離去時，又不小心撞到搞事人甲
甲：喂！你算點呀！撞完我一次又一次，又唔道歉。你知唔知我係邊個？
小金：Ruby姐，唔好意思，我個Friend冇心架，嚟嚟嚟，呢個Round我既！
甲：小金，唔關你事！
德嵐：你想點呀？
乙：你冇聽見我哋Ruby姐點講咩？道歉呀！
德嵐：（沒誠意）對唔住囉！
甲：靚妹，你咩嘢態度呀？
德嵐：咩嘢態度唔好呀？我今日心情唔靚，你唔好惹我！
甲：你心情唔靚？我夠心情唔靚咯！（示意乙一起動手）
【甲乙上前動手打德嵐和小金
【四人扭鬥
阿本：（從遠處喊）嘩，阿Sir，有人打交呀！
【甲乙慌忙離場
阿本：你哋有冇事呀？
德嵐：阿本，對唔住呀！係佢哋郁手先架。（誠懇地）我會改架！我真係會改，你信我呀！
阿本：傻妹，我幾時話唔信你啫？小金，走先喇！
【阿本牽著德嵐的手離場
【燈漸暗
【轉場音樂起
第二場
時間：下午
地點：德嵐家
人物：德嵐、阿本、小金、德嵐母
【燈漸亮
【音樂聲漸小
【阿本睡在沙發上
【茶几有一份禮物
【敲門聲響起，弄醒阿本。阿本行往開門
【阿本和小金進場
【嵐母進場，站在右前台
【嵐母燈亮
【電話鈴聲，阿本聽電話；小金逕自走到沙發，坐下
阿本：喂！
嵐母：（吞吐）喂！請問德嵐喺度嘛？
阿本：（探頭望一望後方）嗯，佢仲訓緊喎，我係佢男朋友阿本，你方唔方便講低邊位搵佢呀？
嵐母：我……我係佢媽咪。
阿本：（詫異）你係佢媽咪？
【小金留意
嵐母：我都知，突然打電話俾佢，一定會嚇親佢。但係，我好辛苦先查到呢個電話號碼，你可唔可以幫我叫醒佢？
阿本：德嵐唔鍾意俾人嘈醒架！不如你講低咩嘢事，我幫你話佢知呀！
嵐母：（無奈）咁好啦！麻煩你同佢講，我返左嚟香港，我想見下佢。
阿本：Auntie，你既說話，我會幫你轉達，但係我唔敢保證，德嵐會有咩嘢反應。
嵐母：我明既！我當年咁走左去，佢一定好嬲我！我會再打嚟搵佢架！
阿本：依家呢個電話號碼係咪可以搵到你架？
嵐母：係呀！
阿本：咁就得喇！我哋保持聯絡呀！
嵐母：阿本，唔該哂！我想麻煩多你一件事，代我同德嵐講聲生日快樂！
阿本：哦，好呀！
【嵐母掛電話，離場
【嵐母燈光滅
【阿本抄下電話號碼，掛電話
小金：從來都冇聽德嵐提起過佢阿媽喎，我仲以為佢阿爸阿媽都唔喺度添！
阿本：德嵐十三歲果年，佢阿媽揼低佢走左！
小金：嗄？！佢阿媽點解走左去呀？
阿本：我都唔知！（猶疑）不過，唔知點解，我覺得德嵐媽咪唔係壞人。
小金：唔理個女走左去都唔係壞人？
阿本：過左咁多年佢都仲記得德嵐既生日，證明佢仲關心個女呀！
小金：關心又點呀！要德嵐受先得架！你知佢幾硬頸架啦！
阿本：幾難都要試下架喇！我覺得，如果可以令德嵐同佢媽咪和好如初，德嵐會開心啲！
小金：知你關心德嵐喇，廿四孝男友。有咩要幫手就出聲啦！
阿本：係呢，你咁早上嚟做咩呀？
小金：（在袋裡拿出包好的CD）冇，我諗住送左份生日禮物俾德嵐先去開舖之嘛！
阿本：你買左咩俾佢呀！
小金：CD囉！你呢？
【德嵐進場
德嵐：（驚訝）小金？你咁早既？
小金：你換哂衫既，諗住去邊呀？
德嵐：我想出去搵啲新人，盡快夾番隊Band囉！
小金：德嵐，你唔記得今日係咩日子呀？
德嵐：（反問）今日咩日子呀？
小金：今日你生日呀！生日快樂！（遞上禮物）
阿本：快啲睇下小金送咩俾你！
德嵐：（拆禮物）嘩，Seasons Lee呀！多謝！
阿本：（遞上禮物）生日快樂！
德嵐：（摸一摸禮物）兩支既？我知喇，鼓棍！（拆開）Tama呀！（興奮）多謝阿本！
【德嵐拉著阿本的手
小金：唉，唔阻你哋喇！
德嵐：咁快走？
小金：阿本有嘢同你講呀！
【小金離場
德嵐：你想同我講咩呀？
阿本：（猶豫片刻）你媽咪打過電話嚟搵你！
德嵐：（激動）冇可能，佢點會有我電話？
阿本：佢話想見你！
德嵐：見我做咩？佢丟低我同爹地走果日，我已經當佢死左！
阿本：我覺得Auntie唔似壞人，佢仲叫我代佢同你講聲生日快樂！
德嵐：我唔想聽！今日我生日，我唔想諗起啲唔開心嘢！
阿本：OK！OK！我哋唔講呢個問題！
德嵐：阿本，我依家淨係想快啲夾番隊Band！音樂係我生命裡面最重要既嘢！
【燈漸暗
【轉場音樂起
第三場
時間：下午
地點：飛馬酒吧
人物：小金、德嵐、阿本、嵐母
【音樂漸小
【燈漸亮
【小金在打掃酒吧
【德嵐興高采烈進場
小金：（愕然）德嵐，咁早既？你唔係話約左啲新人試團架咩？
德嵐：係呀，我特登嚟報喜架，我夾到新Band喇！
小金：咁咪好囉！
德嵐：（打電話給阿本，但不通）奇怪，唔知阿本搞乜呢？成朝都冇開電話！
【阿本領著德嵐母進場
【德嵐見母親出現，十分愕然。一股怒氣不由自主湧上，但竭力忍住
阿本：（見德嵐，愕然）德嵐，點解你會喺度既？
德嵐：呢句說話應該我問你，點解佢會喺度架？
【德嵐衝上前，摑母親一巴掌
【眾人皆愕然
阿本：德嵐，你……
嵐母：（阻止）阿本，我想同德嵐單獨傾下。
阿本：德嵐，我喺出面等你。
【德嵐不理睬阿本
【阿本和小金離場
嵐母：德嵐……
德嵐：你唔好諗住硬食左我一巴，我就會原諒你！
嵐母：你知唔知，我搵你搵得好辛苦。
德嵐：你仲返嚟搵我做乜嘢？我一早當你死左喇！由你揼底爹地同我果日開始，我就當你死左喇！
嵐母：我唔係揼底你哋，我係去左LA照顧你婆婆。果陣公公突然病左，冇人照顧你婆婆。
【德嵐驚訝
德嵐：咁，點解我哋唔一家人一齊過去呀？
嵐母：你爹地唔捨得份工，佢話份工係佢既理想。而且，當時我走得好急，根本冇時間諗咁多。點知我過左去冇耐，就同你哋失左聯絡。
德嵐：你走左唔夠兩個月，爹地就撞車死左？
嵐母：呢件事我都係最近至知！
德嵐：咁，婆婆依家點呀？
嵐母：佢上個月過左身！
【二人沉默
德嵐：對唔住呀！我咩都唔知就發你脾氣。
嵐母：你啲脾氣同你爹地一模一樣。
德嵐：係呢，你而家住邊呀？
嵐母：酒店囉。
德嵐：不如你搬嚟同我一齊住呀！
嵐母：其實我今次返嚟，係想你同我一齊返LA。
德嵐：（困惑）去LA？但係我啱啱先夾番隊Band。
嵐母：你唔駛咁快答覆我既！慢慢考慮下先。
【燈暗
【轉場音樂起
第四場
地點：飛馬酒吧
時間：夜
人物：德嵐、小金、阿本、酒吧老闆
【燈漸亮
【音樂漸小
【德嵐和阿本在舞台前方
阿本：佢哋仲未到呀！
德嵐：你有冇試過打佢哋手提電話呀？
阿本：打過喇，冇開呀！
德嵐：死啦！就快要出場添架！
阿本：你去準備先啦！
德嵐：如果佢哋唔嚟，咁點呀？
阿本：到時執生啦！
【燈光轉
【德嵐站在台中央，又徬徨又無奈
【觀眾開始鼓譟
【阿本在表演區外向德嵐揮手，表示仍聯絡不到隊員
德嵐：（硬著頭皮）各位觀眾，好對唔住，我既隊友喺路上遇到少少阻滯，暫時未嚟到。依家，先由我一個人為大家表演。
【音樂起
【表演區燈光亮
【不一會，觀眾噓聲四起
【粗言穢語此起彼落
【不停有紙團擲向德嵐
【音樂戛然而止
【阿本衝進場為德嵐擋開紙團，拖德嵐下台
【場內噓聲四起
小金：咁多位唔好意思，今晚既表演到此為止。如果大家未盡興既話，歡迎到酒吧區飲番杯。今晚既花生Nuts，免費供應。
【場內一陣騷動
【燈光轉
【酒吧老闆進場
【老闆見店內亂成一團，大怒
老闆：（呼喝）小金！
【小金急急跑來
老闆：（質問）發生咩事呀，間舖搞成咁既？
小金：頭先有Band show，啲觀眾High得滯啫！我等陣會執乾淨佢架喇！
老闆：High得滯？我睇，唔多似喎！小金，我交間舖俾你打理，唔等於俾你亂嚟！
小金：你咁講咩嘢意思先？
老闆：你俾人喺度搞Band show唔緊要，但係搞亂我個場就唔得！
小金：我搞Band show都係想吸引多啲客啫！
老闆：我覺得你想幫啲Friend多過幫我囉！
小金：既然你唔信我，我再喺度做都冇意思！我依家唔撈喇！你滿意啦！
老闆：好，等陣計埋啲人工俾你，大家冇拖冇欠。
【老闆離場
【小金生氣地踢地上紙團
【燈漸暗
【轉場音樂起
第五場
時間：日
地點：德嵐家
人物：德嵐、阿本、小金、德嵐母
【燈漸亮
【轉場音樂漸小
【德嵐和嵐母坐在台中央
德嵐：媽咪，我係咪好冇用呀？
嵐母：點解你會咁問既？
德嵐：我自己夾Band唔成，仲累到小金冇左份工。
嵐母：呢啲都唔係你既錯。
德嵐：媽咪，當年爹地唔肯放棄理想，同你一齊去LA，你有冇嬲佢呀？
嵐母：梗係冇啦！你知唔知我最鍾意你爹地咩呀？我最鍾意佢有夢想。為左夢想，幾辛苦佢都可以捱得住。
德嵐：但係，音樂呢條路太長、太難行，我覺得好攰。
嵐母：你咁後生就嗌攰？你知唔呀，唔係個個人都好似你咁好彩，喺你呢個年紀就搵到自己既理想。有好多人一世隨波逐流，到死果日，都唔知自己一生做過啲咩有意義既事。你話我知，唔玩音樂，你可以做啲咩？
德嵐：我……
嵐母：傻女，做人唔可以冇夢想架！
德嵐：你唔係想我跟你返LA架咩？
嵐母：做媽媽既，最緊要係仔女開心。況且，你邊會捨得揼低阿本呀！
【德嵐害羞
嵐母：阿本呢個男仔唔錯，我都幾鍾意。
德嵐：你講左去邊呀？
嵐母：阿本同我講，你想將Band呢樣嘢，由八十年代帶到嚟依家。
德嵐：爹地曾經話過，希望見到我事業有成。所以我一直好希望，可以做一場出色既Band show。原本，我諗住今年可以做到架！
嵐母：傻妹，2035年先岩岩開始冇耐，你一定可以願望成真喎！
德嵐：弊在我依家連Band都冇呢！
嵐母：做人要樂觀啲！
【敲門聲響
德嵐：我去開門。
【德嵐離場，然後和阿本、小金一同進場
嵐母：啱啱講起你哋，你哋就嚟喇！
小金：講我哋咩嘢先？
德嵐：小金，對唔住呀，都係我唔好喇，搞到你冇左份工。
小金：唔緊要啦，當休息下囉！
德嵐：咁你有咩打算呀？
【小金跟阿本對望一眼
德嵐：你兩個又搞咩嘢呀？
小金：我哋想夾Band囉！
德嵐：夾Band？
小金：你唔係信唔過我哋啲技術丫嘛？唔好唔記得，你係我同阿本既徒弟喎！
德嵐：我唔係信唔過你哋，祇不過，點解你哋突然間會想夾Band既？
小金：你唔記得喇咩？我以前都夾過Band架！後來要喺飛馬打工，先至唔夾之嘛！依家未好囉！可以東山復出！
德嵐：你就東山復出，咁阿本呢？
小金：佢，佢咪處男下海囉！
阿本：喂！我唔出聲，唔代表你可以亂講嘢呀！其實係咁既，我同小金傾過，與其你周圍搵新人，不如我哋三個試一試。我諗，我同小金應該可以符合你既要求既！
嵐母：咁就好囉！唔駛個傻妹咁煩。
小金：我哋隊Band叫咩名好呀？
【眾人思考
德嵐：不如叫2035呀！
阿本：2035？
小金：好，2035。我哋依家有請2035為我哋表演一曲。
【音樂起
【阿本、小金、德嵐作夾Band狀
【燈光轉
【幕下
|
|